Senatè Demokrat Michigan Elissa Slotkin te bay repons pati Demokrat la sou diskou prezidan Donald Trump devan 2 chanm Kongrè Etazini an reyini.
Slotkin te bay repons la madi swa, 2 mwa sèlman apre li te kòmanse manda li kòm senatè.
"Etazini vle chanjman, men gen yon fason responsab pou n fè chanjman ak yon fason iresponsab, e nou ka fè chanjman yon fason pou n pa bliye kiyès nou ye antanke peyi ak demokrasi."
Slotkin te ranpòte laviktwa nan eleksyon Eta sant-wes ameriken sa a ke yo konsidere tankou yon eta pivo, sou Repibliken Mike Rogers, nan mwad Novanm nan. Se menm eleksyon ki te eli Prezidan Trump e majorite elektè Eta Michigan te vote pou misye.
Slotkin di Ameriken yo, politik Trump pral fe yo peye "nan tout aspè nan lavi nou".
"Eske plan misye ede Ameriken avanse? Pa ditou. Prezidan Trump ap eseye fè yon kado nou poko janm wè anvan pou zanmi milyadè li yo. Lap chache plizye trilyon dola pou l remet bay pi gwo boujwa Ameriken yo. E pou fè sa, li pral fe w peye nan tout sekte lavi w."
Diskou Slotkin nan vini nan moman pati Demokrat la ap goumen pou jwenn yon mesaj inifye kont Trump.
