Dapre yon bilan asosiyasyon pwopriyetè chofè an Ayiti (APCH), soti premye janvye pou rive 20 desanm 2024, 30 chofè nan sektè piblik la pèdi lavi yo akoz vyolans yo nan peyi.
APCH souliye, pami viktim yo, gen 3 chofè yo boule tou vivan pou ane 2024 la.
Pi lwen, asosiyasyon an fè konnen yo anrejistre 9 ka kidnapping nan sektè transpò piblik la, plis Gen 4 chofè ki blese ak katouch.
Pou sa ki gen pou wè ak pasaje ki viktim, APCH rapòte vag vyolans yo pote ale 22 pasaje, 46 lòt blesé ak katouch.
Nan entèvansyon l sou antèn Magik9 (100.9) madi 24 desanm 2024 la, Changeux Méhu, prezidan « association des propriétaires et chauffeurs d’Haïti (APCH) » te fè konnen soti 1e janvye pou rive 20 desanm 2024, y asasinen 30 chofè machin piblik. Pami 30 chofè sa yo, genyen 3 yo boule tou vivan.
Sendikalis la te rapousiv ak bilan an pou l di, pandan ane 2024 la, yo te kidnape 9 chofè, genyen tou 4 chofè ki te pran bal.
Daprè Changeux Méhu, pasaje ak pasajèz yo nonplis pa t epanye pandan ane sa a. Y asasinen 22 pasaje/pasajèz, yo kidnape 198 epi te genyen 46 pasaje/pasajèz ki te pran bal.
Pi lwen, Responsab APCH la fè konnen gen 576 machin nan sektè transpò piblik la ki boule, gen 167 machin tou vòlè ale ak yo.
Bilan sa montre kòman sekirite nan traspò piblik la an Ayiti frajil.
N ap fè sonje, dapre Nasyonzini, gen plis pase 5000 moun ki pèdi lavi yo an Ayiti pou ane 2024 akoz vyolans yo nan peyi a.
