Nèg otorite yo kwè responsab pou asasina PDG konpayi asirans sante United Healthcare la anba kod.
Majistra Nouyok la, Eric Adams anonse nouvèl la apremidi a pandan yon konferans pou laprès ak responsab vil la.
Yo idantifye sispèk la kom Luigi Mangione, 26 zan. Yo arete misye nan vil Altoona, Pènsilvani apre yon moun te wè l nan yon restoran Mc Donald's. Moun sa a te kwè li te sanble nèg ak zam lapolis tap chache a, dapre sa otorite yo di pandan konferans pou laprès la.
Yo bare Mangione ak yon zam ki tèt koupe ak zam ki te sèvi pou tire Brian Thompson, PDG konapy asirans la.
Komisè lapolis Nouyok la di Mangione te gen menm rad sou li ke asasen an te mete epi yon mask pou kache figi li.
Komisè a ajoute misye te gen plizyè fo idantite, pami yo yon fo kat idantite eta New Jèrze ki te sanble sa nèg ak zam nan te sèvi pou enskri l nan yon otèl bon mache kèk jou anvan asasina a.
Polis jwenn nan poch misye tou, yon dokiman ki esplike sak te motive li pou l komèt zak la.
Thompson, 50 an, te mouri fiziye devan yon otèl nan Manhattan bonè Mèkredi pase a (4 Desanm). Otorite yo di se yon nèg maske ki tire l e ke asasen an te sanble ap tann ni anvan li te tire l nan do.
