Reprezantan UNICEF an Ayiti, Geeta Narayan di VOA Fon Nasyonzuni pou Timoun nan ap travay de pre ak gouvènman Ayisyen an pou pwoteje timoun ki viktim zak vyolans gang yo.
UNICEF estime jiska mwatye manm gang ame yo se timoun ki gen mwenske 18 an.
"UNICEF pa janm travay poukont li donk an Ayiti menm jan ak nan lot peyi nan mond lan nou travay ak patnè nou yo - nan gouvènman an, nan ONG yo (òganizasyon non-gouvenmantal), Sosyete Sivil elatriye. Paske nou paka ede timoun yo poukont nou nou oblije travay ak patnè sa yo."
UNICEF estime gen ant 30 ak 54% gwoup ame yo ki se timoun. Yon rapò li fek pibliye di gang yo ogmante rekritman yo pami timoun pa 70 pousan pandan ane ki pase a.
Catherine Russell se Direktris Egzekitif UNICEF:
"Timoun sa yo sevi kòm enfòman, kuizinye ak esklav pou fè sèks epi yo fòse yo komèt zak vyolans."
Madan Narayan detaye kalite asistans UNICEF ofri timoun yo .
"Pou komanse nap eseye anpeche timoun yo vinn manm gwoup ame yo -pou fè sa nou dispoze aksè ak edikasyon, aksè ak swen sante pou ke timoun nan ka santi l an sekirite epi rete ak fanmi yo e ke yo pa fòse yo antre nan gang."
Reprezantan UNICEF la di asistans la kouvri timoun ki oblije kite kay yo akoz zak vyolans gang yo. Yo idantifye yo epi asire yo gen aksè ak swen san pedi tan.
"Donk nou resevwa timoun yo nan yo sant tranzit - tigason kou tifi. Nou asire yo gen aksè ak swen sante, psikolojik epi fè yo konnen yo an sekirite yo pa an danje anko epi refere yo ak lot espesyalis ki ka swaye yo plis, pwoteje yo epi reponn bezwen yo."
UNICEF distribye lajan kach tou pou fanmi timoun sa yo pou ke yo ka peye pou edikasyon ak lot bezwen premye nesesite yo genyen.
Madan Narayan pa presize konbyen lajan yo bay, egzakteman.
UNICEF travay tou ak manm fos miltinasyonal la pou ranseye yo sou sityasyon timoun yo epi esplike yo kisa pou yo fè lè yo kontre ak timoun pandan yap mennen operasyon anti-gang yo.
Madan Narayan di premye bagay la se trete timoun yo tankou viktim.
"Nou siyen yon pwotokòl ke nou remèt ba yo li di si ou antre an kontak ak yon timoun ki tap viv ak yon gwoup ame, men kijan pou w pale ak yo men kisa pou fè. Men ki mezi pou pran pou asire ou konsidere timoun sa a premyeman tankou yon viktim e pa tankou yon bandi. Donk nou asire tout sistèm gouvènmantal yo an plas pou apiye timoun sa a le yo kite gwoup ame a.
Li ajoute ke patenarya ak gouvenman an esansyèl nan sikonstans sa a.
Lendi 1 Desanm, LONU te òganize yon rankont espesyal pou diskite sou sityasyon Ayiti. Pandan rankont sa a, responsab yo te eksprime kè sote yo pou timoun yo an patikilye.
Direktris UNICEF, Chatherine Russell te dekri vyolasyon dwa timoun yo an Ayiti tankou yon "abominasyon".
"Fòk gouvenman tranzisyon an pase a l aksyon pou pwoteje timoun yo epi asire gen sekirite pou tout sivil yo. Fòk tout pati konsène travay ansanm pou anpeche epi sispann vyolasyon grav kap fèt kont timoun yo."
Responsab LONU yo kwè li enposib pou rezoud pwoblem nan si Ayiti pa travay prese-prese pou amelyore ensekirite a.
