Repibliken yo ranpòte ase syèj nan Chanm Depite a pou kontwole chanm bas la, sa ki konplete dominans pati a sou pouvwa a nan moman Prezidan-eli Donald Trump ap fè preparasyon pou tounen nan Mezonblanch la.
Viktwa kandida pou depite Repibliken an ranpote nan eta Arizona ansanm ak yon viktwa Repibliken yo te ranpote nan Kalifoni Mekredi, bay pati Repibliken an 218 syèj ki reprezante yon majorite. Repibliken yo te pran kontwol Sena a nan men Demokrat yo ak yon majorite 53 syej sou 100.
Repibliken yo te goumen pou jwenn majorite tou mens sa yo men lidè yo atann yo aske yap kapab apwouve yon seri mezi ki ta boulvese gouvènman federal la epi mete an plas rapido-presto vizyon Trump genyen pou peyi Etazini.
Prezidan-eli a pwomèt pou l lanse pi gwo operasyon depòtasyon peyi Etazini janm fè, ogmante benefis enpo, pini enmi politik li, pran kontwòl zouti pi puisan gouvènman federal la epi chanje ekonomi Amerikèn nan. Viktwa Repibliken yo ranpote asire ke Kongrè a ap disponib pou apwouve ajanda sa a, e Demokrat yo preske pap gen okenn pouvwa pou opoze l.
Lè Trump te eli prezidan an 2016, Repibliken yo te kontwole Kongrè a tou, men li te fè fas kanmenm ak lidè Repibliken ki te reziste politik li yo epitou yon Kou Siprèm ki te gen yon majorite liberal. Pa fwa sa a.
Lè Trump tounen nan Mezonblanch la, li pral travay ak yon pati Repibliken ki finn finn transfòme nèt akoz mouvman "Rann Amerik Gran Ankò" li a epi se jij konsevatè yo ki domine Kou Siprèm nan - pami yo gen 3 li te nomen.
Trump te asiste yon miting politik ak depite Repibliken yo Mèkredi maten pou make premye retou li nan Washington depi eleksyon an.
Trump te deklare: "Mwen sispèk mwen pap poze kandidati mwen ankò amwens nou ta di 'Misye bon, fòk nou vinn ak yon lòt plan." Depite Repibliken yo te ri.
Se Prezidan Chanm Depite a, Mike Johnson, ki ranpòte wòl lidèship Chanm bas la pou ane pwochèn gras ak andòsman Trump. Misye deklare yo pral "mete dife" nan gouvènman federal la ak pwogram li yo epi egzaminen kijan pou chanje pwogram popilè Demokrat yo apiye ke yo te mete an plas pandan ane ki sot pase yo.
Johnson, ki reprezante eta Lwizyann nan Lachanm se yon konsevatè ki aliyen Chanm Depite a pi plis ak Trump pandan sezon kanpay la, nan moman yap fè preparasyon pou yon ajanda 100-jou "anbisye".
Pandansetan, lidè minorite Chanm Depite a, Demokrat Hakeem Jeffries ap eseye mentni pètinans Demokrat yo fas ak nempòt ki pwojè lwa Kongrè a ta adopte. Se yon jefò ki pral mande kolaborasyon ak inifikasyon plis pase 200 depite, malgre pati a ap mijote pèt li sot sibi nan eleksyon an.
