Repibliken nan Sena a eli John Thune kòm pwochen prezidan (lidè majorite) chanm wot Kongrè Etazini an apati ane 2025.
Misye senatè eta Dakota di Sid depi lontan e li gen bon repitasyon pami kolèg li yo. Kèk analis konsidere chwa misye kom yon jès ki montre Repibliken nan Sena a pa sede anba presyon patizan Donald Trump yo tap fè atravè kanpay piblik pou ankouraje yo chwazi yon moun ki lwayal ak prezidan eli a.
Analis yo di viktwa senatè Thune se yon siy Sena a pral kapab mentni yon degre endepandans ak Trump ane pwochèn nan, lè Repibliken yo va kontwole Mezonblanch le e petèt Chanm Depite yo tou. Repibliken yo pral kontwole omwens 52 syèj nan Sena a ki gen yon total 100 syèj. Pou kounyea, sanble yo pral mentni majorite yo nan Chanm Depite a tou. Gen plizyè kous ki poko finn deside nan lachanm.
Thune pibliye yon deklarasyon kote l di: "Ekip Repibliken sa a inifye vizavi ajènda Prezidan Turmp la e travay nou komanse jodia."
Thune gen 63 zan, e moun konsidere l tankou yon lejislatè ki gen anpil konesans e ki gen bon karaktè. Li gen bon relasyon ak kanmarad Repibliken li yo pou pi fo. Li se Repibliken ki gen plis pouvwa nan Sena a apre Mitch McConnell, 82 zan, ki se senatè ki sèvi pi lontan nan listwa Sena Etazini an. Thune te eli senatè pou premye fwa an 2004.
Thune tap fè konpetisyon ak senatè Texas John Cornyn pou pos la, men li ranpote la viktwa sou misye ak yon maj 29-24, dapre sa yon potpawol Thune di Reuters.
Rick Scott ki se yon alye pwoch Trump e ki te gen apui moun ki gen anpil enfliyans ki pa lejislatè tankou Elon Musk te elimine de konsiderasyon pou pos prezidan sena a nan premye tou a.
Chwa Senatè Thune nan fèt apre Prezidan-eli Donald Trump te rankontre Prezidan Demokrat Joe Biden nan Lamezonblanch, kote tou le 2 mesye yo pwomèt yon transfè pouvwa alèz nan mwad Janvye a.
