Apre l fin patisipe nan Pink ladies week la nan peyi Tiki, kote l te fè 2 gòl nan 3 match, Batcheba Louis kite kostim bitez li a sou li pandan weekend nan pou fè yon gwo match kont ekip Stade de Reims lan.
Grenadyè ki te antre nan 66èm minit nan match la pat pran tan pou l te enskri non l nan tablo afichaj la.
2 minit apre antre li sou teren an, Batcheba Louis pwofite de yon erè defans ekip Stade de Reims lan, pou l vòlè yon balon an, antre an sifas reparasyon an, epi klase balon an sou bò dwa gadyen an.
Bitez Ayisyèn nan pat rete la. Nan 76èm minit match la, Louis ta pral fè yon dezyèm gòl apre gadyen an te repouse yon chout. Ayisyèn nan ki te byen plase, poukont li, pouse boul la nan kan an trankilman ak yon kout tèt.
Batcheba Louis siyen premye dekabès li pou sezon an pou ede FC Fleury domine ekip remwaz la (4-1) epi anrejistre yon twazyèm viktwa pou sezon an.
Grasa siksè sa, FC Fleury pran 5è plas nan klasman an avèk 10 pwen. Menm kantite pwen ak ekip Montpellier a, ki te krabinen Guingamp (7-0).
Defansèz Ayisyèn nan Kethna Louis patisipe nan festival sa. Grenadyè te fè 6è gòl nan match la.
Pou pwochen jounen an, Kethna Louis ak Montpellier pral defye ekip Paris FC a, tandiske Batcheba Louis ak tout FC Fleury pral afwonte ekip Saint Étienne nan.
Match sa yo jwe samedi 9 novanm 2024.
