Otowout ak ayewopò Etazini yo pral chaje kou ze zwa pandan wikenn nan nan moman Ameriken ap met deyò pou selebre fet nasyonal ki rele Memorial Day - jou di souvni. Se jou kote Ameriken sonje tout milite ki mouri nan batay pou peyi a.
Oganizasyon ki rele AAA - Asosyasyon Otomobil Ameriken - predi se pral wikenn kote plis moun ap vwayaje nan sezon ete a. Yo di yo atann aske 43,8 milyon moun vwayaje omwens 100 kilomet and Jedi ak Lendi. Se pi gwo kantite moun yo konstate depi 20 an.
Administrasyon Sekirite Transpo a - TSA limenm di gen 3 milyon moun ki va pase nan tchek sekirite ayewopò yo Vandredi.
Ajans nouvel Associated Press pale ak vwayajez Larisa Latimer ke te nan ayewopò OHare Chicago a.
" Vòl nou te rezonab paske mwen vwayaje ak manmanm donk mwen toujou renmen vwayaje an premye klas. Donk mwen te fe preparasyon pou sezon sa a 3 mwa alavans. Donk mwen te jwenn yon bon vol. Se otel nou mwen kwe ane sa a ki te tre che."
O fet, Latimer di tout bagay tet neg.
"Mwen kwe nan ka kote mwen oblije vwayaje mwen oblije akomode m. Men tout bagay che. Machin lokasyon yo tet neg epi otel yo tou. "
Vwayajez Kathy Larko plenyen pou pri yo tou.
"Mwen te oblije sevi ak kredi vwayaj mwen telman pri biye yo te che. "
Larko di li te oblije pi fleksib tou.
"Nou te oblije vwayaje diferan jou. Mwen tre konsyan de pri vwayaj la ap koute. Epi otel yo tou. Kidonk nou oblije pran yon otel pi lwen pase sa nou te espere."
Liy ayeryen Ameriken yo atann yo aske yap transpòte yon kantite rekò pasaje pandan sezon ete a.
Ameriken ap met deyò pa bann e pa paket nan moman kote sondaj yo fe konnen sitwayen Etazini gen gwo ke sote pou ekonomi a epi direksyon peyi a ap pran.
