Pwosè 27 moun lajistis akize an koneksyon ak konplo blanchiman lajan mondyal ki pote non "Panama Papers" la tanmen Lendi nan yon tribinal Panameyen.
Pami moun yo akize yo genyen pwopriyetè kabinè avoka Mossack-Fonseca a ki te oganizasyon santral nan kokenn chenn fuit dokiman an an 2016.
Nap raple ke Panama Papers gen ladann yon koleksyon 11 milyon dokiman finansye sekrè ki ilistre kijan moun ki pi rich nan mond lan kache kob yo.
Repèkisyon fuit dokiman yo rive lwen, epi te lakoz premye minis Island te demisyonen. Sa te lakoz tou lidè Ajantin ak Ikrèn te tonbe anba anpil kritik ansanm ak politisyen Chinwa ak Prezidan Ris la Vladimir Putin.
Pwosè a, ke yo te ranvwaye plizyè fwa, louvri Lendi ak deklarasyon avoka Jurgen Mossak ak Ramon Fonseca, ansanm ak ex-anplwaye kabinè avoka yo a, kap fè fas ak akizasyon blanchiman lajan.
Mossack te prezan nan tribinal la; avoka Fonseca limenm di misye kouche lopital Panama.
"Mwen pa responsab pou zak konsa," Mossack te deklare nan tribinal la.
Pwosè a santre sou akizasyon kom kwa kabinè avoka a te tabli sosyete ekran (setadi fo konpayi)pou achte pwopriyete o Panama ak lajan ki soti nan yon kokenn chenn konplo koripsyon nan Brezil ke moun konnen sou non "Lava Jato" - kivledi lave oto.
Fonseca deklare konpayi a, ki fèmen pot li an 2018, pat gen okenn kontwol sou kijan kliyan li yo taka sèvi ak sosyete ekran yo tabli pou yo nan lot peyi.
Ni Mossack ni Fonseca gen sitwayènte Panameyèn. Panama pa ekstrade sitwayen li yo.
Yon tribinal te jwen mesye yo non koupab de lot akizasyon an 2022.
Dokiman sekrè yo te pibliye an premye nan jounal Alman Suddeutsche Zeitung epi yo te pataje yo ak Konsosyom Entènasyonal Jounalis kap fè Envestigasyon. Gwoup la te komanse pibliye rapo yo fè ansanm ak divès medya an 2016.
