Depatman Deta anonse nouvo restriksyon viza ki sible pwopriyetè, responsab, ak ofisyèl wo plase konpayi vòl chartè, otobis, ak konpayi transpò maritim ki òganize vwayaj pou moun kap chache migre Ozetazini yon fason iregilye.
Nouvo lwa imigrasyon an rele Immigration Nationality Act (INA) Seksyon 212(a)(3)(C) e li antre ann aplikasyon 21 Fevriye.
Nan yon nòt pou laprès pòt pawòl Depatman d Eta a, Matthew Miller pibliye pou anonse nouvel la, li fè konnen nouvo politik la ale pi lwen pase politik Nikaragwa 3C a ki te gen pou wè ak vòl charter ki gen kòm destinasyon Nikaragwa ke Etazini te mete ann aplikasyon nan mwad Novanm 2023.
Gouvènman Ayisyen an te entèdi tout vol charter ki pral Nikaragwa nan mwad Novanm 2023 tou. Anpil migran ki t ap kouri kite Ayiti akoz lamizè ak zak vyolans gang yo tap pran vol sa yo de pluzanplu pou yo eseye rive Etazini.
Entediksyon an te enève anpil moun ki te finn achte biyè pou vwayaje e ki te reyalize sèlman apre yo te rive nan ayewopo ke yo papka pati.
"Imajine w - se milyon dola ki atè a la a. Ariel anik konsa li kanpe yon vòl san okenn avètisman. M panse ke si lap fè yon bagay konsa lap avèti nou - noumenm nou patap pran nan sa nou pran la a. Imajine w lè w depanse $3,000 ou bay yon ajans, $1,000 pòch donk $4,000 ou vann tout sa w genyen epi Ariel fè nou sa - ki lè pou n ale, kisa pou nou fè noumenm?" Fabiola Saint-Jean, yon pasaje chartè ki pèdi lajan li te di jounalis Associated Press an Novanm 2023.
Nouvo politik la sible presizeman operasyon transpo ki vize migran ki vilnerab yo e ki gen kòm bi pou fasilite migrasyon iregilye soti nan peyi toupatou nan mond lan pou antre Etazini.
Depatman d Eta a lanse avètisman pou di moun ki antre Etazini san yo pa gen okenn baz legal pou fè sa, souvan peye tèt nèg epi mete tet yo ak manm fanmi ki akonpaye yo nan danje. Rezilta a se ke Etazini pran mezi pou depòte yo nan peyi natif natal yo, selon lwa imigrasyon peyi Etazini.
Depatman d Eta di "pèsonn pa dwe fè benefis sou tèt migran vilnerab yo".
Nòt pou laprès la fini pou di Etazini pral kontinye pran kontak ak gouvènman epi sektè prive a andedan ak andeyò rejyon an pou elimine kalite biznis sa yo nèt.
Kèk enfòmasyon pou repòtaj sa a soti nan Associated Press
