Lapolis nan vil Kansas City, eta Missouri fè konnen fiziyad ki te lakoz yon moun mouri ak prèske 2 douzèn lot blese pandan parad viktwa ekip foutbol Kansas City Chiefs la se rezilta yon kont ki pete ant plizyè moun.
Chiefs yo se chanpyon Supè Bowl la, ki se chanpyona foutbol zepol kare a.
Chef lapolis Stacey Graves di Jedi viktim yo te gen ant 8 ak 47 an, e ke mwatye pami 22 moun ki blese yo te gen mwenske 16 zan. Gen yon manman 2 pitit ki mouri.
Lapolis di li mete 3 moun anba kod e yo sezi zam yo.
Vis Prezidan Kamala Harris fè komantè sou fiziyad la nan mikwo laprès anvan li te monte nan avyon pou l al nan konferans sekirite Munich la.
"Zak vyolans ak zam se prensipal koz lanmo timoun Ozetazini. Se pa ni maladi, ni aksidan oto se zam ki touye yo. E reyalite a se ke nou taka anpeche kalite krim sa yo fèt si manm palman yo - pami yo Kongrè Etazini - te gen kouraj pou aji yon fason rezonab pou adopte lwa sekirite sou zam. Li trèz enpotan pou tout moun konprann byen bagay yo pa oblije konsa. "
Anketè yo ap mande temwen ak viktim rele yo sou yon liy telefon espesyal.
Fiziyad la dewoule tou pre stasyon tren ikonik vil la, Union Station, e li rive malgre prezans plis pase 800 polisye ki te pran pozisyon pou sekirize evenman an.
