Anvwaye espesyal Etazini pou chanjman klimatik, John Kerry deklare li pap pran retrèt li. Kerry te fè anons la nan vil Davos nan peyi La Suis kote li tap patisipe nan yon rankont lidè biznis.
Pandan wikèn nan Kerry te anonse li pral bay demisyon ni kom responsab administrasyon Biden nan pandan semèn kap vini yo.
" Mesye dam mwen pap pran retrèt mwen. Mwen vle di sa klèman. Map konsantre jefo mwen kote mwen kwè yo ka pi byen sèvi peyi a nan yon ane elektoral Ozetazini. Mwen rekonesan ke Kongrè a pap pase a laksyon jan nou tout panse nou ta dwe fè, donk map konsantre jefo mwen nan domèn sa a pou ke nou ka atenn objektif nou."
Kerry, yon Demokrat, te reprezante Massachusetts nan sena a pandan lontan. Apre sa li te sekretè deta. Joe Biden te chwazi li yon ti tan apre li te ranpote eleksyon mwad Novanm 2020 an pou l ranpli yon nouvo wol ke li kreye presizeman pou konbat chanjman klimatik nan non administrasyon an sou sèn entènasyonal la.
Kerry te youn nan prensipal moun ki te ekri ako Paris sou chanjman klimatik yo an 2015, e li te antre nan pos la ak yon pakèt eksperyans nan peyi etranje. Li te sekretè deta anba administrasyon Obama a, epi li te pase prèske 30 an kom manm Komisyon Sena a kap travay sou Relasyon Etranje.
Dezisyon Biden pran pou l mete Kerry kom anvwaye espesyal li te ann ako ak angajman li te pran pandan li tap mennen kanpay pou l goumen pou Etazini jere defi chanjman klimatik la yon pi byen ak yon fason pi vizib pase administrasyon ki te vini anvan yo.
Kerry di lidè komèsyal ki te rasanble nan vil Suis la ke li posib pou mond lan atenn objektif karbon-zewo a.
"Sel kestyon nou gen pou reponn se si nap gen tan leve defi savan yo pou evite pi gwo konsekans kriz sa a. Se sa ki an je."
Responsab wo plase Etazini, Inyon Ewopeyen an, Lachin, Mwayèn Oryan an ak lot peyi ap asiste Fowom Ekonomik Mondyal la. Li tanmen Madi e lap fini Vandredi.
