Pòtpawòl Depatman Deta, Matthew Miller anonse nouvèl la Jedi.
"Pandan semèn kap vini an sekretè a va vizite La Tiki, Grès, Jodani, Katar, Emira Arab Ini, Arabi Saoudit, Izrayel, Sisjodani ak Ejipt pou rankontre tokay li yo ak lot ofisyèl."
Kè sote pou konfli Izrayelo-Hamas la pa ogmante epi deklanche yon konfli rejyonal pran anplè apre asasina chèf adjwen Hamas la Saleh al-Arouri nan Liban Madi. Izrayèl pa ni konfime ni demanti se limenm ki lanse atak la.
Miller di Blinken pral travay pou kalme tansyon yo.
"Li pral konsantre menm jan lap fè depi 7 Oktob sou jefo pou anpeche konfli a pwopaje. Li pral chache mezi presi pati yo ka pran - pa egzanp sèvi ak enfliyans yo nan rejyon an pou evite konfli a pwopaje. Li pa nan enterè pèsonn, pa Izrayèl pa okenn peyi nan rejyon an - e pa mond lan pou konfli sa a pwopaje pi lwen pase Gaza."
Izrayèl sèmante pou l elimine lidè Hamas yo apre atak 7 Oktob la e li di twoup li genyen sou fwontyè no ak Liban an an eta dalèt maksimom.
Prezidan Joe Biden fè fas ak kritik piman bouk akoz sipo li bay Izrayèl pou l defann tèt li apre atak la, nan moman plis pase 22 mil Palestinyen mouri nan Gaza.
Ekspè yo di kritik yo souvan gen espwa ki pa reyalis pa rapo ak kantite enfliyans Biden oubyen Blinken genyen sou desizyon Izrayèl pran pa rapo ak lagè a.
Brian Katulis se Prezidan Politik Enstiti Mwayèn Oryan an:
"M kwè se yon mit ke Etazini gen yon bouton majik li ka peze pou sispann livrezon sèten zam oubyen si nou ka - jan kèk senatè sigjere - koupe finansman pou Izrayèl e ke sa pral fose Izrayèl aji diferaman fas ak menas yo."
Depatman Deta di pwoteksyon ak asistans pou sivil yo ann Izrayèl ak Gaza epi Sisjodani se va priyorite li pandan vizit Blinken nan.
