Prezidan Etazini Joe Biden kole tèt ansanm ak Prezidan Ikrenyen Volodymyr Zelenskyy nan Lamezonblanch Madi pou mande plis asistans pou Ikrèn nan moman kote peyi a riske echwe nan lagè lap mennen kont Larisi.
Etazini deja voye $111 milya asistans bay Ikrèn depi Prezidan Ris la, Vladimir Putin te lanse yon envazyon kont peyi vwazen li sa gen 21 mwa desa. Sepandan Repibliken yo ensiste pou asistans pou Ikrèn nan lye ak plis lajan pou pwoteje fwontyè Etazini-Meksik la. Demokrat yo pa dako.
Lamezonblanch lanse avètisman pou di si Kongrè a pa apwouve nouvo asistans anvan fen ane a, sa pral gen gwo konsekans sou kapasite Ikrèn genyen pou pwoteje teritwa li - epitou reprann teritwa Larisi kaptire.
Pandan yon konferans pou laprès konjwen li te bay ak Zelenskyy, Biden di yon echèk konsa ta gonfle tèt Putin ak lot agresè nan mond lan.
"San asistans adisyonèl èd nou deja voye bay Ikrèn pou operasyon militè yo pral bout talè konsa. Putin ap konte sou le fèt ke Etazini pap bay Ikrèn plis asistans. Fok nou pwouve misye mal kalkile. Fok Etazini ak Kongrè a jan mwen te mande l semèn pase a apwouve asistans la. Mwen sezi nou rive nan pwen sa a. Fok nou apresye konplètman jan se yon erè e jan le mond pral wè sa si nou pa fè l epi jan Larisi pral pwofite de sa."
Zelenskyy te plede ka pa li tou pandan parèt tou brèf li te fè ak Biden, epi nan rankont prive li te genyen ak lidè Kongrè a. Li di fos Ikrenyen yo batay ak tout fos yo pou repouse envazyon Ris la ak asistans Etazini ak alye Oksidantal yo e ke yo paka fè bak kounyea.
"Nan moman fèt nwèl la ap pwoche, tout fanmi Ikrenyen ki separe akoz lagè a swete pou lagè a fini ak yon viktwa. Pèsonn eksepte pou Putin, pa vle yon lagè pwolonje. Nou reve yon fèt nwèl pezib byen antandu e nap travay pou ranpote siksè sou chan d batay la e nap vanse nan direksyon sa a gras ak oumenm. Donk mèsi byen antandu pou sipo ou. Mèsi Prezidan Biden. Mèsi Etazini. La Glwa pou Ikrèn."
Pandanstan, plis pase 130 responsab wo plase toupatou ann Ewop siyen yon lèt ke yo voye bay palmantè Ameriken yo pou ankouraje yo kontinye apiye Ikrèn.
