Kou Siprèm Etazini anonse Lendi premye kod konpotman etik ofisyèl pou 9 jij li yo. Mezi a se repons tribinal la fas ak presyon moun mete sou li apre revelasyon ki fè konnen kèk nan jij yo te patisipe nan vwayaj liksye kote yo te koze ak gwo chabrak.
Nouvo kod etik la soulve kritik depaman. Gen moun ki fè remake li pa gen ladann okenn mekanizm pou mete l an aplikasyon.
Kou Siprèm nan adopte kod etik la apre nouvèl ki te parèt nan laprès ki kestyone etik kèk pami jij yo, sitou jij konsèvatè Clarence Thomas. Pandansetan, Demokrat yo nan Sena a ap pousuiv yon pwojè lwa ki ta egzije tribinal pi wo plase nan peyi Etazini respekte yon kod etik.
Kontrèman ak lot manm jidisyè federal la, jij Kou Siprèm yo gen yon manda a vi e yo poko janm oblije respekte yon kod etik. Akoz absans sa a, tribinal la deklare nan yon not pou laprès li pibliye ke kod la lakoz kèk pami jij yo konsidere tèt yo tankou moun ki pa gen okenn devwa pou yo respekte règleman etik.
Deklarasyon an kontinye pou di: "pou voye jete malantandu sa a, nap pibliye kod sila a, ki reprezante an laj pati yon kodifikasyon prensip nou konsidere depi lontan tankou règ ki gouvène konpotman nou."
Kod la gen 9 paj e li gen seksyon ki di jij yo pata dwe kite relasyon ak moun a l'ekteryè tribiinal la enfliyanse konpotman ofisyèl yo, ni jijman yo. Li mete restriksyon sou patisipasyonjij yo nan aktivite pou kotize lajan epi reitere limit sou kado yo ka aksepte. Li di tou ke jij yo pa dwe sèvi ak resous jidisyè yo pou patisipe nan aktivite ki pa ofisyèl.
Senatè Demokrat Sheldon Whitehouse ki ap mande pou tribinal la respekte yon kod etik depi lontan deklare se yon mezi "yo te dwe pran depi lontan, men ke yon kod etik pa egzije yo respekte l si pa gen yon mekanizm an plas pou envestige vyolasyon posib yo epi ranfose règ yo."
