Anviwon 13,000 travayè nan izin oto ameriken sispann fè machin e tanmen yon grèv vandredi apre lidè yo pa te ka jwenn yon antant nan gwo distans ki separe sa sendika yo mande nan chita-koze sou kontra yo ak sa 3 fabrikan oto yo nan Detroit vle peye.
Manm yo nan Sendika Travayè Oto Ini, ki gen abreje ann angle UAW, plante pikèt nan yon izin asanblaj General Motors nan Wentzville nan eta Missouri, yon faktori Ford nan Wayne nan eta Michigan, toupre vil Detroit, ak nan yon izin Jeep Stellantis nan Toledo nan eta Ohio.
Se premye fwa nan istwa sendika a ki la depi 88 lane ke li fè grèv nan tou le 3 konpayi yo an menm tan lè kontra 4 lane ak konpayi yo te bout a 11:59 jedi swa.
Grèv yo pwal trase avni sendika a ak endistri oto natif-natal Etazini an nan moman kote fòs travay Etazini an ap gonfle ponyèt li e kote konpayi yo ap fè fas ak yon tranzisyon istorik, soti nan oto ki ap boule gaz nan motè yo pou yo antre nan fabrike machin elektrik.
Sa ka lakoz dealer yo pran pàn oto, fè pri oto mote, e gen enplikasyon nan eleksyon prezidansyèl la lòt ane, nan moman Joe Biden ap chante lwanj tèt li kon prezidan ki plis anfavè sendika nan istwa peyi a.