Sosyete Jounalis Pwofesyonèl Etazini an, SPJ, òganize yon konferans Mèkredi 26 Jiye a sou menas ki poze pou jounalis kap travay an Ayiti.
Moderate a sete ansyen korespondan Vwad Lamerik Michael Drudge, ki pran retrèt li sa gen kèk tan, epi envite a sete Ayisyèn Macollvie Neel, ki se redaktris egzekitif jounal Haitian Times.
Neel, ki pran nesans nan Brooklyn, jere repòtaj Haitian Times fe sou sakap pase an Ayiti.
Li esplike kijan ensekirite a ak mank respè otorite yo pou jounalis afekte travay yap fè.
"Vre menas la soti bò kote polis nasyonal la franchman, ak moun kap travay pou gouvènman Ayisyen an. Men pa rapò ak lapolis - ou pa janm konnen kiyès kap travay ak yo, ki ba yo enfòmasyon, pa fwa se manti, kiles pami yo ki asosye ak gang. Pa fwa fotograf nou ap kouvri yon evenman epi yo sibi menas oubyen polisye pase lòd ba yo pou efase sèten imaj - yo konn menm fè yo montre imaj ki nan kamera yo epi yo efase yo kareman. Men si se sa jounalis nou oblije fe pou li pa mouri, nou di l se sa pou l fè. Paske sa pa vo lapenn. Pavre? Gen anpil negosyasyon ki fèt pou konvenk yo pou yo senpatize ak nou epi pa fè nou efase imaj la."
Li site kom egzanp tou, ensidan ki fèk rive kote yon gwoup moun te pran refij devan anbasad Etazini nan Pòtoprens akoz aktivite gang yo nan katye yo. Li di Haitian Times patka voye jounalis li al kouvri sa akoz kè sote yo te genyen pou sekirite jounalis yo.
Macollvie Neel souliyen tou kijan majorite près entènasyonal la pa fè repòtaj adekwa sou Ayiti. Li di yo pa pran tan pou konprann sakap pase an Ayiti. Li site kom egzanp Mouvman Bwa Kale a.
"Donk pep Ayisyen an revòlte, yo deside pase a l aksyon kont gang yo epi repòtaj mwen we sou sa te an reta pou kòmanse epi apre sa yo te di bagay ki montre yo pa menm konprann kisa Bwa Kale vle di nan kontèks Ayisyen sèvi ave l. Yo tradui l literalman san yo pa bay okenn kontèks."
Youn nan pi gwo pwoblem yo li esplike, se ke anpil medya entenasyonal rale jounalis yo soti Ayiti akoz ensekirite a. Kidonk yo paka fè repotaj a pwofondè ak kontèks jan yo te konn fè a.
Pami medya Ameriken li ki ap fè bon travay sou Ayiti, li site Miami Herald.
Sosyete Jounalis Pwofesyonèl Etazini an egziste depi ane 1909, e li pwomouvwa akse lib enfòmasyon toupatou nan mond lan. Konferans sou menas ki poze pou jounalis Ayisyen yo te fèt sou Zoom.
