Nasyonzini ap rann omaj ak kouraj ak kontribisyon refije yo pote nan sosyete a, nan moman lap selebre jounen entènasyonal refije yo. Pi fò refije nan mond lan kouri kite peyi yo akoz lagè, pèsekisyon, abi dwa moun, chanjman klimatik ak lòt bagay terib.
Ane sa a, Jounen Mondyal Refije yo klere limyè sou tray ak mize 35.4 milyon refije ak migran kap chache azil sibi. Li rekonèt tou bezwen ki egziste pou pwoteje dwa legal yo toupatou nan mond lan.
Responsab Nasyonzini yo lanse apèl pou peyi yo pran mezi konkrè pou amelyore kondisyon lavi refije kap viv lakay yo. Yo mande tou pou peyi yo chache solisyon ki ta bay refije yo opòtinite gen yon avni vyab pou tèt yo ak fanmi yo.
Pandan diskou li te pwononse nan Kan Refije Kakuma a nan peyi Kenya, Wo Komisè Nasyonzini pou Refije yo, Filippo Grandi te bat bravo pou plan gouvènman Kenyan an genyen pou "pouse pou pi devan ak politik inovativ ak enklizif."
Se konsa, dapre Grandi, "plizyè pami demi milyon refije kap viv Kenya ap kapab viv ak travay kòt-a-kòt ak Kenyen epi sa pral ankouraje yo vin pi endepandan, ede bay ekonomi an vi epi redui depandans yo sou asistans imanitè.
Tèm selebrasyon ane sa a se "Espwa Lwen ak Lakay". Li konsantre sou puisans enkluzyon ak solisyon pou refije yo - ki pou pi fò ap viv ak yon epe damoklèz sou tèt yo depi de dizèn lane akoz yo pa gen opòtinite rebati lavi yo nan peyi kote yap viv.
Korespondan VOA nan Nasyonzini, Jenev, Lisa Schlein, ekri vesyon orijinal nouvel sa a