Moun ka tande gwo kout zam kap tire nan kapital Soudan an, Khartoum jodi Vandredi a, malgre lame mete li dakò pou respekte yon seselfe pandan 3 jou pou pèmèt popilasyon an fete fèt Mizilman ki rele Eid al Fitr la, apre preske yon semèn batay ant twoup lame a ak yon fòs rival paramilitè.
Khadija Mansour se yon touris Ejipsyen nan Soudan.
"Mwen pa konn si ou ka tande men gen anpil zam kap tire pandan lapriyè Eid yo. Bonjou."
Lame a deklare nan yon kominike li pibliye ke "fòs zame yo espere rebèl yo pral respekte demann trèv la epi sispann tout manèv militè ki ta bloke trèv sa a.
Fos Sipò Rapid Paramilite Soudan an, RSF, dakò pou respekte trev 72 ze a tou.
Kout zam tap chante kanmenm nan katye rezidansyel kapital la apre lame a te deplwaye a pye pou premye fwa apre yon semen batay ak RSF la.
Solda ak nèg ak zam RSF la te tire youn sou lòt nan katye toupatou nan kapital la, menm pandan lapriye espesyal ki tap dewoule bone nan maten a lokasyon fèt Eid la.
Mohammed Saber Turaby abite nan kapital la.
"Se pi move eksperyans mwen janm genyen pandan fèt Eid la paske mwen lwen manman m ak papa m e mwen santi pa gen okenn rezon pou sa. Distans ant nou se 80 kilomèt. Mwen te konn vwayaje nan vil natal mwen epi tounen nan kapital la menm jou a. Donk mwen santi mwen dezespere paske mwen pa gen kontwòl sou sikonstans sa a. Pa gen anyen mwen ka fè non plis."
Soudane Alia Mutakwel pa kontan non plis.
" Mwen vekse paske se pèp Soudanè a yap fe tò. Mwen desu tou paske nou te gen plan pou fete Eid ki konpletman diferan ak sak te pase an reyalite."
Li poko kle kile trev la pral tanmen. Kout zam tap tire san rete pandan tout jounen an, epi te gen aksan gwo zam lou ak atak ayeryen. Videyo dron kapte montre plizye plim lafimen toupatou nan vil Khartoum ak lot vil nan zòn nan, ki se youn nan katye kote plis moun abite.
Batay sa yo lakoz plizye santen moun pèdi lavi yo sitou nan kapital la, kote yon ka moun ap depann sou asistans alimante.
Ayewopo a mele tou akoz pa gen sekirite nan espas ayeryen peyi a ki lakoz peyi tankou Etazini, Japon, Kore di Sid, Almay ak Espay paka evakye anplwaye anbasad yo.
Nan Washington, Depatman Deta fe konnen san li pa bay detay ke yon sitwayen Ameriken mouri nan Soudan. Lamezonblanch di li poko pran okenn desizyon sou evakyasyon pesonel diplomatik Ameriken men ke Etazini ap prepare l pou evantyalite sa a si nesese.
John Kirby se potpawol Lamezonblanch sou zafè sekirite nasyonal.
"Byen antandu nou gen anpil kè sote pou zak vyolans yo ak batay kap dewoule nan Soudan. Te gen yon swadizan seselfe men li pa dire lontan e moun kontinye blese. Sa mwen ka di w se ke nou konnen ki kote anplwaye nou yo ye andedan ak andeyo anbasad la. Yo pa ansnam yon sèl kote. Donk Depatman Deta a ak anbasad la ap travay pou transpòte yo yo kote ke yo ka ansanm ak an sekirite. Pou kounyea yo pran refij kote yo ye. E ou konnen Pantagòn nan anonse ke yo pral pouse pou pi devan pou mete fòs milite an pozisyon nan zòn tou pre a an ka ke nou ta bezwen yo pou yon evakyasyon."
Kirby di Prezidan Joe Biden patisipe nan diskisyon kap fèt sou sityasyon an nan Soudan e ke lap suiv devlopman yo de trè pre.
Enfomasyon pou repotaj sa a soti nan Reuters
