Plizyè santèn moun pran lari nan vil El Paso, Texas, Samdi apremidi e lè yo kontre ak yon gwoup migran ki te rasanble devan yon legliz yo te chante "Los buenos somos mas" savledi gen plis bon moun pase mechan.
Apepre 300 migran pran refij sou twotwa ki sitye devan legliz Sakre Kè a. Gen kèk ki pè ale nan abri ofisyèl akoz nouvo restriksyon ki an plas e ki vize sere boulon migran ilegal yo.
Se konsa sityasyon an ye nan moman Prezidan Joe Biden ap vwayaje nan vil la pou premye fwa depi li te vin prezidan Etazini. Lap vizite fwontyè a jodi Dimanch 8 Janvye a.
Prezidan Biden te anonse semèn pase ka ke Etazini pral voye tounen Meksik tout Kiben, Nikaragweyen, Ayisyen ak Venezyelyen ki antre Ozetazini ilegalman. Mezi sa a fè pati yon elajisman politik imigrasyon ki rele Tit 42 a.
Nouvo règleman yo ofi tou pawol imanitè pou yon afè 30,000 moun pa mwa - moun ki soti nan 4 peyi sa yo - si yo aplike an liy epi jwenn yon patwon finansye.
Biden pral rive El Paso Dimanch apremidi, epi apre sa li va ale Meksiko Siti pou rankontre lidè Amerik di No yo.
Juan Tovar, yon migran Venezyelyen ki travèse antre Ozetazini ilegalman san gad fwontyè pa bare li, ap chache yon sof kondui pou l ka viv e travay Ozetazini.
Tovar di: "Nou pa move moun, pou fo nan nou vinn isit pou chache yon pi bon avni epi pou timoun nou."
Nouvo politik Biden nan etann jefo ki deja an plas pou anpeche Venezyelyen antre Ozetazini ilegalman. Jefo sa a an plas depi mwad Oktob la.
Tovar di Associated Press: "Tout bagay nan men Bondye."
Enfomasyon pou repotaj sa a soti nan Associated Press
