Prezidan Joe Biden ak Emmanuel Macon fè chita tande Jedi ki se poto mitan vizit d eta prezidan Franse a ap fè Ozetazini.
Lidè yo te diskite lagè Ikrèn nan, kè sote yo genyen pa rapò ak agresyon Lachin nan rejyon Endo-Pasifik la epi kè sote Ewòp genyen sou lwa Biden nan sou chanjman klimatik.
" Mwen kapab di ke Prezidan Macron avèm nou kanpe ansanm depi nou kòmanse travay ansanm nan rankont G7, G20 e la Frans se yon alye nou bay anpil anpil enpòtans. Ou konnen soti depi nan Revolisyon an pou rive nan Gè Mondyal yo nou toujou kòkòt ak figawo nan sa nap fè. E nap kontinye jefò sa yo nan LOTAN, G7, G20 - gen anpil anpil bagay nap fè ansanm."
Macron bò kote pa li di se yon onè pou'l fè vizit sa a nan Washington.
" Mwen ekstrememan kontan ak nonore pou'm isit pou premye vizit d eta administrasyon ou. E pou mwen se pi bon prèv ki egziste de amisye ak kolaborasyon ki egziste ant nou depi lontan. Se sa ki baz relasyon nou. Nou pral diskite anpil sijè men - san di petèt nap kolabore nan moman gen anpil defi global akoz lagè Ikrèn nan ke Larisi lanse. Se yon gwo sij diskisyon pou nou."
Biden ap onore Macron ak premye dine d eta prezidans li Jedi swa, men 2 lidè yo te fè chita tande nan Biwo Oval la anvan sa, kote yo te diskite sou kestyon difisil 2 peyi yo ap travay pou jere.
Macron di fòk yo senkwonize pi plis pwojè yo pou kontrekare chanjman klimatik.
"Nou pral diskite sou chanjman klimatik ak biyo divesite ak aksyon komen kap fèt nan domèn sa a - se la alyans nou an kritik."
Biden bò kote pa li di jounalis yo li pare pou defann politik li sou chanjman klimatik.
"Lezetazini pap prezante ekskiz e mwen pap prezante ekskiz pou lwa a paske mwen ekri l. Men gen de enstans kote le nou ekri yon lwa masif konsa ki vo $360 milya yo kokenn chenn envestisman sou chanjman klimatik -- toujou ap gen kek bagay ki merite chanje."
Nan tèt ajènda a te gen lagè Ikrèn nan ki dire depi 9 mwa deja kote Biden ak Macron ap fè fas ak rezistans nan moman yap eseye rete inifye epi mentni asistans ekonomik ak militè pou Kyèv pandan lap eseye kwape fòs Ris yo.
Lidè yo te bay yon konferans de près ansanm apre rankont yo a.
Aswè a pral gen yon dine d eta kote pami pla yo pral sèvi, gen oma ki soti nan eta Maine, file bèf ak marmelad echalot, fwomaj ameriken ak yon gato chifon oranj ak pwar epi krèm frèch.
Yon dine d'eta se yon gwo one diplomatik Etazini rezeve pou alye pi pwoch li yo.
Enfomasyon pou repotaj sa a soti nan Associated Press
