Ansyen jwè ekip basketbòl Kansas ak Nouvo Meksik, Gethro Muscadin, ki te nan koma depi mwad Desanm nan apre yon aksidan otomobil, mouri. Li te gen 22 zan.
Inivèsite Kansas ak Nouvo Meksik konfime nouvèl la madi. Antrenè ekip Kansas la, Bill Self di Muscadin mouri byen ta Lendi swa.
Muscadin te jwe pou Kansas pandan sezon 2020-2021 an epi apre sa li te transfere nan Nouvo Meksik. Li te jwe 12 match pou Jayhawks yo ak 12 match pou Lobos yo anvan li te deside kite ekip Lobos la, kèk jou anvan aksidan oto a tou pre vil Topeka, eta Kansas.
Antrenè Self di: "Malgre li te pase yon lane avèk nou sèlman, nou te renmen Gethro anpil e mwen toujou pral sonje li kòm jwè Jayhawk. Nou voye senpati nou bay fanmi li ak pwòch li yo pandan moman difisil sa a."
Antrenè a pibliye yon mesaj sou Twitter tou kote li di: "Tèlman jèn. Yon tristès. Li pral toujou ko-ekipye nou. RIP."
Muscadin se yon natif natal peyi d Ayiti. Li kite Nouvo Meksik paske "nou tou lè 2 te dakò se pat yon bon ekip pou misye," antrenè Richard Pitino te di laprès nan mwad Desanm 2021.
