Nan moman lagè Ikrèn nan ap pwoche fen 5èm mwa li e pandan nouvèl yo rapòte se chak jou Larisi ap lanse atak sou zòn kote sivil abite, presyon ap monte sou administrasyon Biden nan pou l deziye Larisi kòm yon peyi k ap patwone zak teworis.
Semèn sa a, daprè yon nouvèl jounal politico pibliye nan Washington, prezidan Chanm dè Reprezantan Etazini an, Nancy Pelosi, di Sekretè Deta Antony Blinken si li pa egzèse pouvwa Kongrè a ba li pou l plase Larisi anba diziyasyon sa a, manm Kongre a pral fè sa, yo menm.
Larisi deja tonbe anba yon seri de sanksyon k ap paralize ekonomi l nan --sanksyon ke Lèzetazini ak yon bann lòt peyi enpoze sou li. Sepandan, si yo lage sou do l etikèt peyi k ap patwone teworism la, chaj la pral pi lou pou li toujou. Alòske eleman entènasyonal sanksyon aktyèl yo se yon bagay peyi yo kowòdone ak anpil swen, deziyasyon “eta k ap patwone teworism nan” kapab debouche sou yon trètman ki pi sevè avek sanksyon ki apikab tou kont yon peyi tyè k ap fè biznis ak yon endividi ris, yon pèsonalite ris oubyen yon konpayi ris.
An plis de sa, deziyasyon an kapab elimine iminite ke souverènte Larisi bay byen ak avwa peyi sa a posede Ozetazini, sa ki ka ouvè chemen an pou Ameriken ki viktim lagè nan Ikrèn nan sevi ak tribinal ameriken pou yo asiyen gouvènman ris la.