Kantite nouvo ka KOVID-19 yo ap ogmante Ozetazini e sa ka vin pi mal nan mwa k ap vini la yo. Otorite sante federal yo lanse avètisman sa a mèkredi e yo lanse apèl bay zòn ki plis afekte yo pou mande yo anvizaje posiblite pou yo remete nan plas li obligasyon pou moun mete mas anndan kay.
Yon gwo kantite ka enfeksyon ak ospitalizasyon oblije yon bon pati nan peyi a remete an aplikasyon rekòmandasyon Sant Ameriken pou Kontwòl ak Prevansyon Maladi (CDC) ki mande pou moun mete mas epi pran lòt prekosyon kont enfeksyon.
Pou le moman, ogmantasyon yo konsantre sitou nan rejyon nòdès ak santwès peyi a. Direktris CDC a, Doktè Rochelle Walensky, ki t ap patisipe nan yon pwendeprès nan La Mezon Blanch, deklare:
“Sepandan, lòt vag ogmantasyon ki te fèt nan le pase demontre nou ke viris la vwayaje atravè tout peyi a.”
Doktè Walensky ajoute: “Pou yon kantite rejyon ki pa sispann ogmante, nou konseye otorite lokal yo ankouraje moun yo itilize estrateji prevansyon, tankou mete mas nan figi yo menm lè yo anndan kay, epi pou yo ranfòse posiblite pou moun fè tès epi suiv tretman.”
