Chanm Bas la apwouve plan depans la avèk yon vòt 368 kont 57, e se Repibliken yo ki lage tout vòt “non” yo. Lejislasyon an gen pou l ale devan Sena a ki pral vote rapidman sou li.
Prezidan Joe Biden te mande Kongrè a apwouve yon lòt plan asistans 33 milya pou Ikrèn sa gen 2 semèn; men, palmantè yo deside ogmante kòb la pou asistans militè ak èd imanitè.
Depite Demokrat Rosa DeLauro, prezidan Komisyon Alokasyon Bibjetè Lachanm nan, deklare:
“Pwopozisyon-lwa sa a pral pwoteje demokrasi, mete limit nan agresyon Larisi a epi ranfòse pwòp sekirite nasyonal nou.”
Depite DeLauro pale konsa pandan li t ap eksprime sipò li pou plan depans la. Prezidan Biden te mande Kongrè a prese vote lejislasyon an yon fason pou l ka siyen l e fè l tounen yon lwa anvan asistans pou defans Ikrèn nan rive nan bout li pi ta nan mwa me a.
Kèk Repibliken, ki pa dako ak lejislasyon an, akize Demokrat yo deske yo twò prese voye aletranje lajan taks sitwayen ameriken yo. Demokrat yo, ki pataje opinyon Prezidan Biden, gen yon kontwòl tou mens nan Sena a; men lejislasyon an bezwen apui Repibliken yo pou l pase nan gran kò a.
