CRE: Sekretè Jeneral Òganizasyon Nasyon Zini an, Antonio Guterres, fè konnen mèkredi li klè ke “pa gen chans pou nou jwenn yon akò lapè imedyatman nan Ikrèn”, men li pran yon angajman kote l di òganizasyon mondyal la “pa p jann kwaze bra li” e li “dwe rete pare tout tan pou l fè tout sa k posib pou mete fen nan lagè sa a ki pa gen sans.”
Pandan Guterres t ap pale nan vil Vyèn, alòske Prezidan otrichyen an, Elexander Van der Bellen, te bò kote l, li fè laprès konnen Nasyon Zini ap fè sa l kapab pou l sove lavi moun epi fasilite evakyasyon yo ak livrezon asistans imanitè. Guterres ajoute:
“Lage sa a pa p dire pou tout tan. Yon moman pral rive kote negosyasyon lapè yo va sou tab la. Pral gen yon moman kote m espere li va posib pou n jwenn yon solisyon pou problem nan ann akò avèk chat LONU an ak dwa entènasyonal.”
Otorite yo nan Ikrèn fè konnen fòzame peyi a rive repouse sòlda ris ki te nan vil Kharkiv, yon vil nan pati nò-dès Ikrèn ki te anba atak depi Larisi te lanse envazyon li a nan fen mwa fevriye pase a.
Prezidan Volodymyr Zelenskyy, ki te pale nan jounen madi a, di moun yo dwe fèt atansyon ak sa ki rele “bon nouvèl.” Li ajoute tou senpleman: “Se piti piti n ap pouse do fòs okipasyon an.”
