Otorite sanitè nan vil -la fè konnen yo vle anpeche yon nouvo vag sou-varyan omicron pwovoke a gaye nan Filadelfi. Nan 10 jou ki sòt pase yo nouvo ka COVID-19 pran yon ogmantasyon 50 pousan; kidonk nivo ki pouse otorite sanitè yo fè rekomandasyon pou rezidan vil-la mete kach-ne menm andedan lakay yo, daprè Dr Cheryl Bettigole, ki se direktris sante piblik.
Otorite nan domèn sante yo kwè ke gwo ogmantasyon yo resanse nan sans sa-a gen pou wè ak sou-varyan Omicron tip BA.2 ki te gaye seryezman an Ewòp ak sou kontinan azyatik-la, e ki te vin dominan isit Ozetazini nan semèn ki sot pase yo.
"Si nou pa pase a laksyon imedyatman, nou pral tonbe nan mènm tyouboun nou te ye anvan-an e ki te debouche sou yon gwo katite hospitalizasyon ak ka lanmò," Dr Bettigole fè konnen.
Gen 750 moun te pèdi lavi yo nan epidemi pandan sezon ivè-a. Nou pa dwe pran chans sikile san mask toutotan nou pa gen enfòmasyon sou severite nouvo sou-varyan sa-a. Responsab lasante nan Filadelfi pral pase lòd pou moun komanse mèt kach-ne andedan antrepriz yo apati dat 18 avril kap vinn la-a.