Premye Minis Ayisyen Ariel Henry lanse apèl ankò pou òganize eleksyon nan peyi a nan moman advèsè li yo ap mande kreyasyon yon gouvenman tranzisyon pou kontre zak vyolans gang yo, kap ogmante pi plis chak jou.
Kritik Henry yo di li pa lejitim ankò paske Lendi make fen manda Prezidan Jovenel Moise, ki te deziye'l premye minis yon ti tan sèlman anvan li te mouri asasinen epi kreye yon vid politik nan peyi a.
Alye Henry di se selman palman an ki ka wetire l sou pouvwa a e palman an pap fonksyone paske manda pi fò manm ni yo ekspire. Yo ajoute ke premye minis ki te vini anvan yo te depase manda prezidan ki te nomen yo.
Lendi, nan yon diskou nasyonal a l'okazyon 7 Fevriye, Henry di eleksyon se sèl solisyon pou enpas politik la e li rejte lide pou'l ta remèt pouvwa a bay yon gouvenman tranzisyon pou 2 zan - ki se yon plan gwoup Akò Montana a pwopoze.
Akò Montana a gen ladann ekonomis, jounalis ak ansyen politisyen. Li pote non otèl kote gwoup la te rankontre pou diskite sou platfòm politik li a.
Gwoup sa a chwazi ekonomis Fritz Jean kòm lide yon gouvènman tranzisyon.
Nan yon entèvyou li bay Vandredi, Jean deklare eleksyon enposib kounyea paske gang yo kontwole pi fò teritwa nasyonal la kivledi lap trè difisil pou moun al vote. Li ajoute nan sikonstans konsa eleksyon an patap gen lejitimite menm si yo te jwen mwayen pou yo kontwole delenkan yo.
Lari a te pi kalm ke d'abitid Lendi. Biznis yo ak lekòl yo te fèmen akoz manifestasyon kont Henry. Sepandan manifestasyon sa yo te piti epi epapiye pasi pa la.
Henry pa presize kile eleksyon jeneral ta dewoule. Fok gouvenman an nomen yon konsèy elektoral pou oganize eleksyon sa yo.
