Yon kamyon ki tap transpòte gazolin chavire epi eksploze nan nò Ayiti. Dife a pwopaje nan machin ak kay ki te nan zòn nan e plis pase 50 moun ak plizyè douzèn lòt blese. a
Eksplozyon an, rive ta nan aswè nan vil Okap. Viktim ki te kouri soti deyò epi yo te pran rele anmwe nan moman yo tap obseve gwo dife ki tap anvayi katye yo a. Kèk hè'd tan apre, blese yo te komanse rive nan yon lopital lokal ki pat an mezi pou'l trete paket moun sa yo. Responsab lopital la te oblije mande asistans pou jwenn materyo medikal ak medsen ki te ka ede yo swaye blese yo.
Moun te ka wè dè douzèn kadav epapiye tou pre lye kote eksplozyon an rive, nan moman moun tap pran bokit pou ranmase gaz ki tap koule soti nan kamyon an pou yo bwote lakay yo. Dave Larose, yon enjenyè ki travay Okap te dekri sèn nan pou Associated Press.
Eksplozyon an rive nan moman Ayiti ap fè fas ak yon rate gaz ki sevè, epi pri gaz la ki monte 17 wotè e ki lakoz lopital yo oblije voye pasyan ale. Rate a te lakoz tou kèk ponp gaz te fèmen pwovizwaman, lekòl ak biznis pat fonksyone, e gouvènman Etazini ak Kanada te mande sitwayen yo kite Ayiti pandan yo kapab.
Kounyea, Ayiti ap pote dèy pou viktim eksplozyon an ke responsab yo kwè rive apre kamyon gaz la te charive pandan li tap eseye evite frape yon motosiklèt, dapre majistra adjwen Kap Ayisyen Patrick Almonor.
Misye di yo anrejistre omwens 53 lanmo e plis pase 100 moun blese. Gen yon afè de 20 kay ki boule nan zòn nan. Majistra adjwen an di li atann ni aske bilan viktim yo ogmante pi plis, paske yo poko konte tout moun.
Almonor di lopital Okap la bezwen plis enfimyè, doktè ak pwovizyon medikal de baz yo pou swaye blese yo.
Premye Minis Ariel Henri deklare li devaste e li anonse ke administrasyon li an ap tabli lopital pwovizwa nan zòn nan pou ede moun ki afekte yo.
Ansyen premye minis Claude Joseph pibliye yon mesaj kondoleyans sou kont Twitter ofisyèl li a jodia kote li fè konnen lap pote dèy pou viktim yo.
