O Venezuela, kriz politik la ap anvlimen aprè yon nouvo “corps” politik pwo-gouvènmantal e tou-puisan (Asanble Konstityant Nasyonal la) fin pran desizyon pou l wete nan men palman an, ki anba kontwòl opozisyon an, tout pouvwa lejislatif li tandiske Minis Jistis la, ki nan kache, akize Prezidan Nicolàs Maduro deske li mele nan yon eskandal koripsyon.
Desizyon asanble konstitiyant la –ki pa benefisye rekonesans peyi rejyonal yo ni Lèzetazini- pa tèlman genyen yon enpak pratik. An fèt, gouvènman maduris la te mare 2 men, 2 pye palman an imedyatman aprè eleksyon ki te pote l sou pouvwa a an 2015, epi asanble konstitiyant tou nèf la genyen nan men li yon pouvwa preske san limit ki pèmèt li fè e defè. Sepandan, menm desizyon an atire atansyon sou plan gouvènman an genyen pou l sèvi avèk “corps” politik tou-puisan sa a –ki reyini ofisyèlman pou l fè refòm nan konstitisyon an- yon fason pou l reyalize pwòp ajanda politik li.
Se san pèdi tan lidè opozisyon an denonse desizyon an ki, daprè yo, reprezante yon gwo kou an plis pou demokrasi; men yo ajoute mannèv sa a pa gen okenn enpòtans pou yo e yo pral kontinye mouvman manifestasyon yo. Youn nan dirijan opozisyon an, Henrique Capriles, deklare:
Youn nan lidè opozisyon an nan Venezuela, Henrique Capriles.
“Kominote entènasyonal la ta dwe konnen ke nan Venezuela rejim Maduro a ap egzekite yon kou-deta kont Leta li-menm; paske, lè ou rejte palman yon peyi, se yon sòt de kou-deta ou bay Leta.”
Nan matine samdi pase a, palman an te òganize yon sesyon espesyal avèk yon sèl pwen nan lòd-di-jou a: “Ann defann konstitisyon nasyonal la.” Nan sesyon sa a, ki te dewoule an prezans anpil diplomat etranje, depite ak senatè venezuelyen yo te pibliye yon mosyon kote yo lanse apèl pou yo mande yon ankèt sou tantativ rejim Maduro a fè pou l disoud palman an, epi yo mande asistans kominote entènasyonal la. Lejislatè yo di nan mosyon an:
“Nou lanse apèl bay kominote entènasyonal la pou nou mande li apiye, avèk tout aksyon ki apwopriye, defans souverènte pèp venezyelyen an avèk lejitimite palman nasyonal nou an.” .