Isit Ozetazini, Sena a ap pare pou l vote sou yon mezi ki prevwa itilizasyon 858 milya dola pou pwolonje yon pwogram k ap koupe taks kontribyab yo, yon pwogram ki te antre ann aplikasyon sou gouvènman ansyen Prezidan George Bush.
Sena a kapab apwouve pwojè lwa sa a ki gen ladan n tou pwolonjman benefis pou moun ki nan chomaj depi lontan ak yon desizyon pou koupe 2% taks sou anplwaye yo ap touche. Mezi sa a reprezante yon konpwomi dwòl ant Prezidan Barack Obama ak lidè Repibliken nan Kongrè a.
Apre apwobasyon Sena a, lwa a ap gen pou l ale devan Chanm Depite a kote moun pa ka prevwa sa k pral pase paske anpil manm Pati Demokrat la ---Pati Prezidan Obama a--- di se yon konpwomi ki bay moun rich yo twòp avantaj.
O kòmansman, Prezidan Obama ak palmantè demokrat yo te espere pwolonje pwogram koupe taks la sèlman pou moun k ap touche mwens ke 250 mil dola pa ane e pou fanmi k ap touche pou premye fwa 250 mil dola nan yon ane. Sepandan repibliken yo di “wè-pa-wè” fòk pwogram nan aplike pou tout moun.