Prezidan Ris la, Vladimir Putin akòde Ameriken Edward Snowden sitwayènte Ris. Snowden se anplwaye Ajans Sekirite Nasyonal la (NSA) ki te pibliye dokiman tòp sekrè ki bay detay sou pwogram siveyans Etazini kont sitwayen li yo. Apre li te revele sekrè sa yo, li te kouri kite Etazini pou evite yo mete'l anba kòd.
Snowden, 39 an, se youn pami 75 etranje lidè Ris la akòde sitwayente
Lendi, men misye di li pa gen entansyon renonse sitwayènte Ameriken li. Larisi te ba li azil an 2013 e se la lap viv depi lè a.
Depatman d Eta Ameriken te pase nan ten-ten nouvo sitwayènte Ris Snowden nan. Depatman an di "yo taka byen fè misye enski l pou sèvis militè" epi fè l goumen pou Larisi nan envazyon Ikrèn nan.
Malgre sa, avoka Anatoly Kucherena kap defann Snowden di misye pa vize pa mobilizasyon 300,000 twoup Putin dekrete semèn pase a pou ede peyi a nan lagè li kont Ikrèn - kap echwe - paske Snowden poko janm sèvi nan lame Ris la.
Putin di se sèlman moun ki gen eksperyans milite ke yo pral mande goumen, malgre gen anpil nouvèl ki di kòm kwa gen lòt moun yo rele tou, pami yo gason yo arete pandan manifestasyon kont mobilizasyon an.