Nan peyi Venezuela, Prezidan Hugo Chavez fè konnen li kanpe plan li te genyen pou l devlope enèji nikleyè akoz pwoblèm ki genyen nan santral nikleyè nan Japon an.
Nan yon diskou ki pase sou televizyon madi 15 mas 2011 la, Prezidan Chavez deklare evenman ki rive o Japon apre tranblemanntè ak sounami te frape peyi sa a montre gwo risk ki makònen ak devlopman yon pwogram nikleyè.
Lidè venezuelyen an presize, li pa gen okenn dout ke trajedi sa a ap deranje devlopman enèji nikleyè lòt kote nan lemond.
Venezuela ak Larusi te siyen yon akò ane pase a pou yo bati yon santral nikleyè elektrik nan peyi Amerik di Sid la --- se t ap premye santral nikleyè Venezuela t ap posede.