Lidè La Chanm dè Reprezantan Nancy Pelosi chante lwanj Taiwan Vandredi e li pwomèt solidarite Etazini.
Pelosi di vizit li ann azi, ki te soulve anpil kolè bò kote la Chinn epi deklanche egzèsis militè san presedan, pa gen anyen pou wè ak chanje statu quo a.
"Yo taka eseye anpeche Taiwan patisipe lòt kote, men yo pap izole Taiwan pa eseye anpeche nou vwayaje la. Nou patisipe nan rankont a wo nivo - senatè yo nan sezon prentan an Repibliken kou Demokrat, e nap kontinye vizit sa yo nou pap kite yo izole Taiwan. "
Eskal Pelosi nan Taiwan te make vizit nan pi wo nivo yon responsab Ameriken fè la depi 25 an, kote lit e rankontre Prezidan Taiwanèz la Tsai Ing-wen epi chante lwanj demokrasi ak dosye dwa moun zile a.
Peken te kouri vit kondane vizit Pelosi a, ki te mennen li tou nan Sengapour, Malezi, ak Kore di Sid anvan li te rive Japon, ki se youn nan alye pi pwòch Washington.
5 Pami misil Peken lanse yo ateri nan zòn eksklizif ekonomik Japon an epi soulve lot pinga bò kote Tokyo ke aktivite militè Lachin nan Detwa Taiwan nan menase sekirite nasyonal e rejyonal la.
Pou reponn aktivite militè Peken yo, Prezidan Taiwan nan di peyi li pap pwovoke konfli men li pral defann ak fòs souvrènte li ak sekirite nasyonal li. Premye Minis Su Tseng-chang limenm te gen pawol pi piman bouk pase sa le li te di "vwazen mechan an ap eseye fè chèlbe devan pòt nou."