Yon lòt kokenn chenn sibèatak frape sit gouvènman Ikrenyen an Mèkredi. Pantagòn nan di fòs Ris yo ap vanse tou pre frontye Ikrèn e ke yo pare pou "lanse yon atak militè, pèske nempòt kilè kounyea."
"Nou kwè yo pare," sekretè de près John Kirby di jounalis yo Mèkredi.
Kirby di Pantagon nan kwè "fòs adisyonèl Ris ap vanse sou Donetsk ak Luhansk, 2 rejyon nan Ikrèn, men li pat vle konfime konbyen twoup Ris egzakteman ki rive nan 2 rejyon sa yo.
VOA pa jwenn konfimasyon endepandan konsènan prezans twoup Ris yo nan Donbas la.
Imaj Satelit sa a ke Maxar Technologies fe montre twoup ak ekipman ki deplwaye tou pre Krasnaya Yaruga, Risi. (Satellite image ©2022 Maxar Technologies via AP)
Pòt pawòl Kremlen an, Dmitry Peskov di laprès leta Ris ke dirijan swadizan Repiblik Popilè Donetsk ak Luhansk yo mande Prezidan Ris la Vladimir Putin pou'l ede yo goumen kont Fòs Zame Ikrenyen yo.
Kirby pat vle blame dènye sibèatak la sou La Risi, men li di dega konsa nan espas sibè a fè pati "kaye jwèt Ris la". Kyèv bò kote pa li blame Moskou pou sibèatak yo malgre La Risi demanti li gen anyen pou'l wè ak sa.
Yon responsab wo plase depatman defans Etazini di jounalis yo pi bonè Mèkredi ke yon afè 80% plis pase 150,000 twoup Ris ki antoure Ikrèn nan pozisyon pou yo avanse, pami yo twoup ki abò plis pase 10 bato d'atak ki nan Lanmè Nwa a.
Korespondan VOA nan Pantagon nan, Carla Babb ekri vesyon orijinal nouvel sa a ann Angle