Ostrali ap achte nan men Etazini 3 soumaren atak ki mache ak enèji nikleyè nan kad yon antant pou 2 dizèn lane ant 3 nasyon, ak Grand Bretay, nan lide pou ranfòse prezans alye yo nan rejyon Azi-Pasifik la nan moman LaChin ap enpoze li pi plis militèman.
Prezidan Joe Biden di desizyon pou pataje ak Ostrali teknoloji nikleyè ameriken ki sansib, se yon gwo zafè – e yon pa ki nesesè. Li te pale konsa lendi nan San Diego nan eta Kalifòni, pandan li te kanpe ansanm ak lidè Grand Bretay ak Ostrali.
Ak antant 2 dizèn lane sa a, soumaren ke Etazini ak Grand Bretay fabrike, ki mache ak enèji nikleyè, pwal sikile nan dlo Ostrali nan lane 2027. Distans pou rive nan ane 2030 yo, Ostrali pwal achte pou pi piti 3 – jiska 5 – soumaren ki gen zam konvansyonèl, e ki mache ak enèji nikleyè, ki fèt pou chache e atake lòt soumaren. E 3 nasyon yo pwal travay ansanm pou devlope yon nouvo soumaren atak – yon pwojè ki ka pran 2 dizèn lane.