Nan yon nòt pou laprès Anbasad amerikèn nan Pòtoprens la fè soti , piblikasyon rezilta sa yo reprezante yon etap enpòtan alòske ayisyen yo ap vanse nan direksyon rekonstriksyon peyi yo.
Nan nòt sa a Etazini mande tout aktè politik yo pou rezoud kesyon ki poko jwenn solisyon yo konsènan rezilta yo pandan peryòd kontestasyon an. Dapre nòt la toujou, pèp ayisyen an demontre yon gwo pèseverans ak pasyans pandan tout pwosesis la e Etazini espere pèp la ap kontinye eksprime l pasifikman.
Nòt la fini pou l di , Etazini kanpe bò kote pèp ayisyen an nan jefò pou rekonstwi peyi l e pou li finalman li wè rèv li reyalize lè l va wè yon peyi stab, pi demokratik e pi pwospè.
Bò kote pal, sekretè Jeneral Oganizasyon Eta ameriken yo (OEA), José Miguel Insulza bat bravo pou piblikasyon sa a . Mesye Miguel Insulza felisite pèp ayisyen an yon lòt fwa ankò poutèt li egzèse responsabilite sivik li nan yon anbyans kalm jounen eleksyon yo ak pou pasyans li pandan sant tabilasyon t ap trete rapò ki te soti nan 11 biwod’ vòt. Nan nòt OEA voye bay medya yo , li felisite tou responsab yo ki kondwi pwosesis nan amoni ak lwa elektoral la e konstitisyon peyi a.
Sekretè Jeneral OEA kwè sa pral sèvi pou ranfòse eta de dwa ak demokrasi reprezantativ la ann Ayiti. Responsab òganizasyon emisferik la siyale travay Misyon Obsèvasyon Elektoral OEA-KARIKOM nan (JEOM) ki te prezan nan tou aspè pwosesis la pami yo prezans li 24-sou-24 nan sant tabilasyon an pandan 2 semèn.
Mesye Insulza fini pou l di, lap tann pwochen faz nan pwosesis elektoral la k ap pèmèt kandida yo soumèt plent ak kontestasyon yo. Li mande kandida yo pou yo fè nan menm atmosfè lapè ki te make pwosesis la nan dènye mwa yo la a.