Nan yon entèvyou eksklizif Minis Afè Etranjè ayisyen an, Claude Joseph, bay Lavwadlamerik, li di li gen gwo espwa ke y ap kapab rezoud yon fason pozitif ka kote bandi kidnape 17 misyonè etranje ann Ayiti. Misye Joseph deklare:
"Gouvènman an trè preokipe e li manifeste preokipasyon li. Men, sa ki pi enpòtan an, sè ke o nivo DCPJ, mwen konnen genyen yon kolaborasyon etwat avèk FBI. Donk, pou le moman se tout sa m kapab di w sou kesyon sa a. E mwen konnen nou gen de trèm trè bon teknisyen nan DCPJ. Mwen trèz optimis, mwen menm, ke avèk kolaborasyon FBI n ap kapab jwenn yon denouman "heureux" pou sityasyon sa a."
Ayisyen nan Titanyen pran lari pou mande liberasyon misyone yo, 19 Oct. 2021.
N ap raple ke gang 400 Mawozo a te kidnape 16 misyonè ameriken ak yon kanadyen ki t ap travay ann Ayiti kòm manm misyon kretyen Christian Aid Charities, 16 oktòb pase a. Yo mande yon ranson $17 milyon dola pou liberasyon yo.
Minis Joseph fè nou konnen nou l ap vizite Washington nan kad yon seri rankont ak gwo responsab Ameriken yo. Li di:
"Jodi a mwen rankontre avèk Brian Nichols; se toujou nan kad kwazad pou pèmèt ke Prezidan Jovenel Moise jwenn jistis. Nou mande kolaborason tout peyi paske, ankò yon lòt fwa, se yon krim ki gen yon dimansyon transnasyonal; donk, kolaborasyon yon peyi tankou Etazini nan ankèt la... li ekstrèman enpòtan."
Ayiti te mande patisipasyon FBI nan ankèt sou asasina a e Etazini te satisfè demann nan. Pou sa k konsene vizit chèf diplomasi ayisyèn nan Ozetazini, Misye Joseph deklare:
"M ap rankontre ak lot moun nan Depatman d'Eta trè byento; m ap rankontre ak kèk ofisyèl o nivo de l OEA (Oganizasyon Eta Ameriken yo). Mwen gen plizyè lot rankont Washington ke m ap patisipe..."
Sou Sekretè d Eta Ameriken pou Zafè Emisfè Oksidantal yo, Brian Nichols, pibliye yon mesaj sou kont Twitter ofisyèl li, kote li fè konnen kè-sote li genyen pou sitiyasyon misyonè yo ann Ayiti. Li eksprime santiman li nan deklarasyon sa a:
"Nan rankont mwen ak Minis Afè Etranjè Ayiti @claudejoseph03, mwen te pataje gwo preyokipasyon mwen genyen konsènan sekirite konsitwayen nou yo ke yo te kidnape nan dat 16 oktòb pase a, e konsènan sekirite tout lòt ameriken ak ayisyen ki viktim ensekirite a."
Konsènan dosye asasina Prezidan Jovenel Moise la, Minis Joseph di tout moun ki responsab yo dwe fè fas ak lajistis. Sou pwen sa a li fè VOA konnen:
"Pa genyen okenn moun ki "au-dessus de la loi." Premye Minis la, Minis Afè Etranjè a, oubyen kèlkeswa minis ki nan gouvènman an. Donk, nou gen yon reponsablite pou n reponn pou nenpòt sa yo ta repwoche nou devan lajistis,"
Premye Minis Ayisyen Ariel Henry pwononse yon diskou nasyonal bone Vandredi maten, 29 Oct. nan Potoprens. (Foto: @PrimatureHT Twitter)
Pou sa ki konsènen "Akò 11 Septanm nan" ke Premye Minis Ariel Henry te siyen ak kèk lidè opozisyon an, Minis Joseph di aplikasyon antant sa a ap pran tan.
"Sitiyasyon Ayiti a se yon sityasyon konplèks. "Le premye minis", li montre -e tout moun wè sa- ke c'est un homme patient. Mwen kwè ke gen de sitiyasyon w ap abòde... ou paka abòde l an tèt cho. Se sa k fè ke "cette question d'accord politik", l ap gen yon denouman ki "heureux dans la mesure où" premye minis la pran tan l anvan ke li ale "vers la formation d'un gouvernement."
Minis Afe Etranje Ayiti Claude Joseph, ak Jacquelin Belizaire nan studyo Vwadlamerik nan Washington, 2 Nov. 2021.
Minis Afè Etranjè ayisyen an, Claude Joseph, te pale ak Jacquelin Bélizaire nan stidyo Vwadlamerik nan Washington, madi 2 novanm 2021 an.