Prezidan ameriken an, Joe Biden, twouve l nan Jeddah, nan Arabi Sawoudit, ki se dènye etap yon toune nan Mwayen Oryan an, e kote li te rive apre yon vòl dirèk te pran l ann Izrayèl kèk èdtan apre Wayòm Sawoudyen an te anonse ouvèti espas ayeryen li pou “tout avyon”, sa ki mete fen nan entèdiksyon vòl ki prale ou k ap sòti Izrayèl.
Desizyon sa a reprezante yon jès Riyad poze nan kad yon pi gwo rapwochman ant Izrayèl ak mond arab la, nan moman gouvènman peyi arab yo ap mete tèt yo ansanm kont menas Iran poze yo. Pou Biden, rapwochman sa a fè pati efò administrasyon l nan ap deplwaye pou Mwayen Oryan an tounen yon rejyon ki pi entegre e pi stab.
Prezidan Palestinyen an Mahmour Abbas ak Prezidan Etazini Joe Biden nan vil Bethlehem, Vandredi 15 Jiye 2022.
Nan yon deklarasyon Biden fè, li di:
“Desizyon Arabi Sawoudit la kapab ede ranfòse plis toujou entegrasyon Izrayèl nan rejyon an.”
Deklarasyon sa a konsènen tou Arabi Sawoudit, sa ki fè konprann li posib pou gen yon nòmalizasyon diplomatik nan rapò ant 2 peyi yo, nòmalizsayon ki ta reprezante pi gwo elajisman Akò Abraham yo ke pati konsène yo te siyen sou gouvènman Trump la.