Ministè afè etranjè Larisi a anonse lendi li deklare 40 manm misyon diplomatik Almay la “persona non grata”. Se yon aksyon revanj kifkif apre gouvènman alman an te mete deyò menm kantite diplomat ris.
Nan yon deklarasyon ministè a pibliye, li fè konnen li pran desizyon an apre Lalmay te deklare, nan dat 4 avril pase a, “yon bon kantite diplomat nan anbasad ris la nan Bèlen, se endezirab.”
Minis afè etranjè alman an, Annalena Baerbock, deklare Ris li te ekspilse yo pa t janm fè okenn travay ki gen rapò ak diplomasi pandan tout tan yo te an Almay la, men pito “yo t ap travay an jeneral kont libète nou e kont amoni nan sosyete nou an.”
Chèf diplomasi almann nan, ki di desizyon Larisi a se pa yon sipriz, ajoute: “Okontrè, diplomat alman yo t ap travay seryezman pou ranfòse relasyon bileral yo malgre difikilte sikonstans yo; epi, avèk ekspilsyon sa yo se tèt li ankò Larisi fè mal.”