QUITO —
Otorite peyi Ekwatè fè konnen 6 Kolonbyen yo te arete kom prezime asasen yon kandida a la prezidans Ekwatoryen nan mwad Out la mouri asasinen andedan yon prizon nan Guayaquil.
Otorite yo pa bay okenn detay sou sak pase Vandredi.
Asasina sa yo rive nan moman Biwo Pwokirè a te prèske fini envestige asasina Fernando Villavicencio, ki mouri anba kout zam 9 Out nan moman li tap kite yon miting politik.
Politisyen an ki te gen 59 an pat pami kandida ki te pi popilè yo, sepandan asasina li nan gwo lajounen, mwenske 2 semèn anvan vòt la te chokan epi raple tout moun kijan krim ogmante anpil nan peyi Ekwatè.