Enstiti migrasyon Guatemala a anonse li pral egzije pou tout touris ki sòti Repiblik Dominiken obteni viza apati mwad Fevriye a. Peyi a site pakèt Dominiken kap rive Guatemala nan wout pou y al Ozetazini.
Yon pot pawòl enstiti a di kantite Dominiken ki antre Guatemala "yon fason iregilye ak objektif pou yo rive Ozetazini ogmante de 104 an 2019 a 1,393 an 2022.
Viza kategori B a, ke yon moun dwe mande nan konsila Guatemala yo pral akòde Dominiken pèmisyon pou yo pase 90 jou nan Guatemala.
Nan mwad Septanm 2021, Guatemala te anonse menm tip viza pou Ekwatoryen yo.