Yon avoka k ap defann Jean-Claude Duvalier fè konnen ansyen lidè egzile a gen plan rete ann Ayiti e li espere poze kandidati l pou prezidan. Mèt Reynold Georges di laprès, Mesye Duvalier gen dwa rete ann Ayiti paske se “peyi li”. An menm tan, Mèt Reynold kontinye ap pwoteste kont pwosedi responsab lajistis yo aplike kont kliyan l lan.
Lajistis akize mesye Duvalier pou koripsyon, detounman lajan ak lòt abi pouvwa pandan rejim brital li a ki te dire 15 zan. Mèkredi 19 janvye 2011 la, yon ansyen pòtpawol l'ONU ak 3 lòt Ayisyen ke anpil moun konnen te akize Mesye Duvalier pou krim kont limanite, pami yo zak maspinay, kòm plent kriminèl.
E toujou nan jounen mèkredi 19 janvye 2011 la, genyen 4 ansyen viktim rejim nan ki depoze plent yo ofisyèlman kont ansyen Prezidan Duvalier. Moun sa yo se Michele Montas, madan defen jounalis Jean Dominique, ansyen depite Alix Fils-Aimé( Responsab Komisyon nasyonal Dezamenman, Demantèlman e re-ensèsyon) ) , Dr Nicole Magloire ak Claude Rosier.
Gwoup k ap defann dwa moun gen lontan depi y ap mete presyon pou Mesye Duvalier fè fas ak lajistis pou abi kont dwa moun ki te fèt sou rejim li a, pami yo maspinay ak asasinay plizyè milye moun. Gen akizasyon tou kòmkwa li ta vòlè plizyè milyon dola nan kès leta. Men li pa klè si gen ase prèv pou yo jije Mesye Duvalier pou zak atwosite ki te fèt pandan rejim li a.