Prezidan chilyen an, Sebastian Pinera, vizite dimanch 19 septanm 2010 la min lò ak kuiv San José a ki nan nò peyi a kote 33 travayè bloke nan yon bafon ki mezire preske yon kilomèt .
Efò pou fouye yon 3èm tinèl kòmanse nan kad sa kèk obsèvatè konsidere kòm operasyon sekou ki pi difisil nan listwa .
Anplwaye min sa yo rete bloke anba tè a depi anviwon 6 semèn. Prezidan Pinera ki te rankontre ak fanmi mesye yo, bay yè dimanch la yon konferans pou laprès kote l di sa l panse de sitiyasyon an.
Prezidan chilyen an deklare: “ Nou déjà fè sa nou kapab pou n retire mesye yo anvi e nou kwè nou pral reyisi nan pakèt efò nap deplwaye la yo. Kilè? Nou pa konnen egzatteman. Men sa kapab fèt pi bonè ke nou kwè."
Depi kèk tan déjà minè ki anba tè yo genyen avék yo, antwòt, kèk kamera videyo ki pèmèt yo kenbe kontak ak peyi yo e ak rès mond la. Yè dimanch la, Lilianeth Gomez, pitit fi Mario Gomez, youn nan minè ki anba tè a, te gade youn nan video yo e li di sa l panse.
Madmwazél Lilianethj Gomez fè konnen li sezi wè kijan mesye yo genyen moral yo byen fò, kijan lespri yo byen dyanm, yo pa dekouraje.
Ajans Ayewoespasyal Lèzetazini an (NAZA) ap bay gouvènman chilyen an konsèy sou fason pou l pèmèt mesye yo rete an bòn sante mantal e fizik pandan yon operasyon sovtaj ki kapab dire lontan ankò.