Vyolans kontinye ap sakaje Meksik: 21 moun mouri nan nò peyi a nan yon gwo afwontman ame ki sanble te mete fas pou fas gang dwòg rival. Batay la eklate jedi premye jiyè a nan eta Sinora, sou yon distans 20 kilomèt ak Arizona, yon eta ameriken ki sou fwontyè Lèzetazini ak Meksik. Biwo minis jistis la nan Sinora fè konnen lapolis arete 9 moun -pami yo genyen 6 ki blese.
Mèkredi 30 jen an, nèg ame te tiye yon asistan komisè gouvènman an nan Ciudad Juarez, yon vil ki sou fwontyè de peyi yo , pa lwen zòn El Paso, eta Texas, e kote ki gen anpil vyolans. Responsab meksiken yo presize asistan sa a rele Sandra Salas, li t ap travay nan nò eta Chihuahua; manzèl jwenn lanmò l nan machinn ni pandan yon gad-di-kò l t ap kondui e kèk lòt te akonpaye l.
Mwa pase a, bandi ame te asasine Jesus Manuel Lara Rodriguez nan zon Juarez. Juarez, ki nan eta Chihuahua, se rejyon kote gen plis vyolans nan peyi Meksik, e prezidan Felipe Calderon te mete l nan tèt lis seri dispozisyon gouvènman n nan ap pran pou l sere-boulon katèl dwòg yo. Anviwon 23 mil mouri nan vyolans ki makònen ak aktivite dwòg nan Meksik depi prezidan Calderon te pran pouvwa a an 2006 .