Arestasyon yon aktivis Palestinyen ki ede oganize manifestasyon kont Lagè Gaza a sou kanpis inivèsite Columbia nan Nouyok soulve kestyon sou si etidyan etranje ak moun ki gen green card (kat rezidans Etazini) gen pwoteksyon kont depotasyon.
Mahmoud Khalil jwenn arestasyon li Samdi anba men ajan Sèvis Imigrasyon ak Ranfosman La Dwann (ICE). Responsab Depatman Sekirite Nasyonal la ak Prezidan Donald Trump endike arestasyon an lye dirèkteman ak wol li te jwe nan manifestasyon nan sezon Prentan ane pase a nan Inivèsite Columbia nan Nouyok.
Yo kenbe Khalil nan yon sant detansyon imigrasyon nan vil Jena, Lwizyann, kote lap tann yon pwosè ki takapab evantyèlman debouche sou depotasyon li.
Arestasyon misye soulve anpil kritik ke yo te vize l enjisteman akoz aktivism li tandiske gouvènman federal la esansyèlman dekri misye kon moun ki senpatize ak teworis.
Ann gade ki kalite pwoteksyon ki egziste pou etidyan etranje ak moun ki gen green card Ozetazini:
Eske yo ka depòte yon moun ki gen green card?
Yon moun ki gen green card gen rezidans pemanan legal Ozetazini.
Jaclyn Kelly-Widmer, yon pwofesè dwa nan lekòl dwa Inivèsite Cornell ki anseye lwa imigrasyon di rezidan pèmanan legal jeneralman jwi anpil pwoteksyon e yo ta dwe trete yo tankou sitwayen ki pi pwoteje yo apre sitwayen Ameriken.
Men pwoteksyon sa a pa absoli. Otorite yo ka toujou depòte moun ki gen green card si yo komèt sèten krim, oswa si yo pa notifye responsab imigrasyon yo lè yo demenaje. Yo ka depòte yo tou si yo komèt frod nan kad yon fo maryaj pa egzanp.
Depatman Sekirite Nasyonal di yo mete Khalil anba kòd akoz dekrè Prezidan Trump ki entèdi anti-semitism.
Trump di manifestan yo fòrfete dwa yo pou rete Ozetazini si yo apiye gwoup Palestinyen Hamas la ki kontwole Gaza e ke yo deziye tankou òganizasyon teworis.
Khalil ak lòt lidè etidyan gwoup Apartheid Divest Inivèsite Columbia rejte akizasyon anti-semitism lan. Yo di yo fè pati yon mouvman anti-lagè pi laj ki gen ladann kèk etidyan Juif ak lòt gwoup. Men kowalisyon manifestasyon an pa fwa te eksprime sipò pou lidè Hamas ak Hezbollah yo, ki se yon lòt oganizasyon Islamis Etazini deziye kòm gwoup teworis.
Ekspè yo di responsab yo sanble endike ak retorik yo ke yap eseye depote Khalil sou baz ke lap patisipe nan yon aktivite teworis oubyen ke l poze yon menas.
Yo pa kondane Khalil pou okenn aktivite ki gen rapo ak teworism. Vreman vre, yo pa akize l ni jwenn li koupab de okenn krim.
Sepandan ekspè yo di gouvènman federal la gen otorite lajman laj pou arete epi eseye depote yon moun ki gen green card sou baz ke lap patisipe nan teworism.
Dapre Lwa Imigrasyon ak Nasyonalite a, moun ki gen green card pa oblije jwenn kondanasyon pou yo bagay pou yo elijib pou "depote yo", dapre Kelly-Widmer. Li posib pou yo depote yo si sekretè sekirite nasyonal la oubyen minis jistis la gen rezon kwè yo te patisipe nan yon aktivite oubyen yo ka patisipe nan aktivite teworis.
Sepandan, Kelly-Widmer di li poko janm konstate yon ka kote swadizan aktivite teworis la te dewoule Ozetazini e li kestyone si patisipe nan manifestasyon jan Khalil te fè kalifye.
Kisa ICE di sou Arestasyon Misye?
Youn nan kestyon kle ak dosye Khalil la se sa ajan ICE yo te di avoka li lè yo te arete l.
Avoka li, Amy Greer di ajan ki mete l anba kod lakay li tou pre inivèsite a te deklare y ap aji sou yon lod Depatman d Eta pase pou revoke viza etidyan li.
Men lè Greer te enfome yo ke Khalil gen rezidans pèmanan Ozetazini, li gen green card, yo te di yo pral revoke dokiman sa a pito.
Kelly-Widmer di echanj sa a soulve kestyon pa rapo ak si ajan ki arete misye te familye ak lwa peyi Etazini oubyen si vreman vre te gen yon "veritab mepri pou eta de dwa a."
Li ajoute: "mwen kwè nou ta dwe gen gwo kè sote bagay konsa ap fèt."
Kisa ki pwochen Etap la nan Dosye a?
Sekretè d Eta Marco Rubio deklare nan yon mesaj li pibliye sou rezo X ke administrasyon an pral "revoke viza oswa green card patizan Hamas yo Ozetazini pou yo ka depote yo."
Si yon moun Ozetazini ak yon viza etidyan, Depatman d Eta gen otorite pou l revoke viza a si moun sa a vyole sèten kondisyon. Pa egzanp, avoka imigrasyon Florid John Gihon di souvan Depatman d Eta anile viza etidyan etranje ke yo arete paske yo tap kondui sou.
Men anski konsène yon moun ki gen rezidans pèmanan, jeneralman sa mande pou yon jij imigrasyon detèmine si yo ka depote l.
Gihon di pwochen etap la se pou Khalil resevwa dokiman ki akize l e ki esplike poukisa yo arete l epi poukisa gouvènman an vle depote l. Dokiman an ta dwe genyen tou yon avètisman ki mande l konparèt devan tribinal imigrasyon.
An jeneral misye taka resevwa dokiman sa yo 72 hè apre arestasyon li epi apre sa li ta gen pou l konparèt devan yon jij imigrasyon. Sa taka pran ant 10 jou ak yon mwa dapre Gihon.
Men li siyale kounyea gen anpil delè nan sistèm tribinal imigrasyon an e se souvan yo deplase kliyan yo nan divès enstalasyon nan diferan eta.
Avoka a di: "Nou gen moun ke yo mete nan detansyon epi apre sa voye yo nan dives enstalasyon. E pa fwa yo travèse peyi a ak yo."
Avoka Khalil yo depoze yon dosye legal pou defye detansyon li. Yon jij federal nan Nouyok pase lod pou yo pa depote Khalil toutotan tribinal la pa tande dosye li.
Yon odisyon pwograme pou Mèkredi.