Malgre fòs lòd yo te rive repouse atak gang yo e menm rive kase fe kèk ladan yo ki te tonbe nan boukante kout zam ak polisye yo, sa pa anpeche abitan yo kontinye tande gwo kout zam k ap chante pasipala.
Yon abitan eksplike, se pa kouri yo ta kouri, men se tansyon an ki twòp. Yo paka sipòte ankò.
Yon lòt viktim eksplike l ap travay depi lè l te gen 10 lane sou tèt li. Nan dènye atak la, bandi yo boule kay li rapyetè.
Viktim nan ki t ap kriye fè konnen li pa rive sove menm yon recho.
Pandan nouvo atak sila, bandi yo mete dife nan yon legliz Pòsmachan ki konn akeyi anpil fidèl.
Pou yon travayè ki konn pote machandiz ak lòt bataklan pou moun nan zòn nan, se pa moman pou gen chirepit, divizyon, men pito se moman pou met tèt ansanm pou viv youn ak lòt, paske nou tout se Ayisyen.
N ap fè sonje plizyè katye nan kapital la sibi atak gang yo semèn sa, ladan yo, Nazon ak Pòsmachan