Nan nòt sa MSF soti Mèkredi 13 Novanm nan, yo di ke òganizasyon an degoute apre atak sila ki fèt sou anbilans li. Dapre MSF se "group brigad vijilans ak lapolis " ki fè atak sila sou anbilans yo.
Yo fè konnen ke gwoup sa yo ak polisye PNH la te kanpe anbilans ki tap transpote pasyan yo.
Nòt la deklare "nan dat 11 novanm nan, touprè lopital SF genyen Dowya a lapolis te kanpe yon anbilans MSF ki t ap mennen 3 jèn ki pran bal, sa lakòz yo te oblije fè yon transfè nan yon lopital piblik Pòtoprens. "
Yo fè konnen ke fòs lòd yo te eseye arete pasyan yo, apre sa yo te eskote anbilans la nan lopital Lapè, e yo te pran kontwòl blese yo epi yo te touye omwen 2 ladan yo.
MSF akize fòs lòd yotou deske yo te vyolan ak anplaye yo .
Chèf misyon an Christophe Garnier denonse zak sila e li di ke "Ekip nou yo bezwen yon minimòn sekirite pou yo kapab bay bon jan laswenyay."
VOA Kreyòl eseye antre an kontak ak plizyè responsab nan PNH la pou fe komante sou akizasyon MSF la, men nou pa rive jwenn okenn repons.