Politik

Kout Tonè nan Pòtoprens : Konsèy Prezidansyèl la Bay Garry Conille "yon So Kabrit"

HAITI-POLITICS/

Konsèy prezidansyèl tranzisyon an revoke Premye minis Ayisyen an Garry Conille e mete Alix Didier Fils-Aimé nan plas li.

Dapre jounal ofisyèl peyi a "Le moniteur", Garry Conille pa premye minis ankò. Se biznisman Alix Didier Fils-Aimé ki pral pran fonksyon sa.

Doktè Garry Conille, ki te gen misyon pou eseye met Ayitj sou ray, pran yon so kabrit nan men KPT. Yon revokasyon ki rive sèlman 5 mwa apre nominasyon l nan tèt Primati a.

SEE ALSO: Ayiti: Konsèy Prezidansyèl la Revoke Premye Minis Conille

N ap souliye depi plizyè semèn 2 branch egzektif yo, KPT a ak Primati a te nan yon chirepit.

Konsèy prezidansyèl la te mande yon remaniman ministeryèl pou chanje kèk minis. Sepandan, Garry Conille pat brannen.

Apre plizyè semèn san rive jwenn yon solisyon ak kriz ant 2 antite yo, KPT pran yon desizyon gwo ponyèt pou mete Garry Conille deyò nan gouvènman an.

Pou Garry Gonille ki te rive nan primati a nan mwa jen, desizyon KPT a pa konfòm ak manman mwa peyi a li plen ak inegalite.

Conille site atik 158 konstitisyon an pou l fè sonje: "Premye minis lan responsab devan palman an. Se sèlman si Premye minis lan demisyone oubyen palman an sansire l, ki ka mete fen nan fonksyon l. Konsèy prezidansyèl paka pran plas palman an e egzèse pouvwa li pa genyen".