Ouganda, ki se yon peyi pòv nan Afrik Lès la, te fè plizyè eksperyans aksidan menm jan an pandan dènye ane yo : kamyon sitèn ki chavire, ki lakòz moun mouri paske yo t ap eseye rale gaz, epi machin nan vin pran dife, boule moun ki ozalantou . Daprè pòtpawòl lapolis Kampala a, Patrick Onyango, aksidan an te fèt madi a 15:00 (12:00 GMT).
"Aksidan trajik jodi a nan lokalite Kigogwa te fèt lè yon kamyon sitèn te chavire e li pran dife, sa ki laòz 11 moun jwenn lanmò yo, pami yo 9 granmoun ak 2 timoun," lapolis te di sou rezo sosyal X la. "Viktim yo te boule jouk yo te vin derekonèt yo."
Kigogwa sitiye anviwon 25 km nan nò Kampala. Imaj ki te soti nan zòn aksidan an te montre fisèl jòn lapolis ki te toupatou sou rès kamyon sitèn ki kankannen an, pandan medsen lejis yo ak sèvis sekou yo t ap enspekte kay ozalantou ki te detwi nan eksplozyon an.
Daprè lapolis la, kamyon sitèn nan te soti Kampala e li t ap ale Gulu, nan nò Ouganda, yon distans ki prèske 650 kilomèt. "Malerezman, moun ki te kouri pou vin ranmase gaz yo te pami sa ki pi afekte yo" dapre sa yo te di nan yon kominike.
Kat bilding ki te gen ladan yo magazen tou nèf boule rapye tè nan dife a, yo te presize. "Evènman trajik sa a raple nou risk ki asosye ak aksidan kamyon sitèn ak enpòtans pou nou pran prekosyon lè n ap manyen pwodui ki danjere," lapolis te ensiste.